Fola ti naš Pere
Ča si slidi pute
Naših drogih storih
Onih ča su pri nos
Svoje križe nosili
Lavurali i molili
Životima trudnin
Nebo zaslužili
Fola ti Petre
Ča si svojin za križien
Mlodima našima
– I onima ča čedu bit –
Pokozo kojin putien
Vajo hodit
Za se ne izgubit
Svitlost križa slidit
Moj brat Jurko lipo doško
Drugi Jure na svit duošo
Ća ćeš boje, ća ćeš lipje
Doškot dicu svoje dicie
Razvesel se brate mili
Digni glovu, čelo digni
Buog je velik, čuda čini
Radujete se i veselite
Storih naših se spomenite
Blagoslov von svima šaje
Storo teta lozie vaše
Cviti bili
Golubice bile
Za karšćenje,
Pričest, krizme
Na stole sletile
A za žienbe
Na tavaje bile
U jatima doletile
Vridne ruke naših nonih
Po sve noći isprovjale
Sa rodelon bez kalupih
Cvite sjuštovale
Sve bi kuće, a i kole
Po mešru vonjale
Za sve druge fešte vele
Drugo slatko isprovjale
Cvitima su – po starinsku-
Sakramente veličale
Duše svieti na priliku golubice
Prosvit pamet, udil svite
Da se trudi naših storih
Na gomilu ne zahite
Bili cviti, bile golubice
U rukamin naših mlodih
Daje poletite
* Recept u kuharici D.M. Radice, kao Nabra(n)o pecivo Jelsa
Naša molo
“Kokota zaklala”
Divnja postala
U svako doba
Žena more bit
Uz pomoć Božju
Dicu rodit
Store zaminit
Stonje ašeštit
A fameja
Naprid hodit
*Zapisano po sjećanju na kazivanja naših starih Kukelj(?) t. Tonke – kad je Beba postala divnja
Vele
mole
od stinie
i od gvožđo
cili porat
s njima opason
od Kanuna do Pumpurele
kako botuni od vešte
za bit provi mladić
tukalo je svaku priskočit
Ča no nuono
infišo gledo
i to pul neba
a ne pul poja
još je stavi i očole
za ne falit
i ne reć jednu za drugu
-onin oblok povar Murvice
nieće izlagat
oblok priko Broča
hoće reć
da će bit velega maštrola
U konobu pod plafun
uvik je visi
jedon lipi
muškadur
u zeleno pituron
zelenon mrižon opason
zimi i liti
okolo njega je vonjalo
već bis iz vrot
mogo znat
koja je spiza
ili frut
sakrivena od puno just
i ose i maške
dohodili su na manje
somo nona ili mat
iz njega su vazimoli
ča je potriba
za parčat
onda bi se
muškadur zaguzo
ma bi opet
na misto osto
Iga,
Pumpurela
i Kanun
kako tri parsta
od ruk
a opet svaka
na svuoj muod
da u vali bude
boji uguod
Na miriću od terace
arija se blišći
to je moja mat
stavila supraš
otvorila pokriv
da se žerava razgori
da non roba ne izgori
navlaš pri nedije
kad je bilo za suprašat
cilo brime
košuje bile
vešte, fuštoni
lancuni i šugamoni
faculeti, intimele….
sve kaj novo
i sve vonjo
-i još ostane
za pod štramac
da je manje
za suprašat